NamPower, NamWater waarsku teen skuldafskrywings
Grootmaat water en kragverskaffers NamWater en NamPower sê voorstelle vir hulle om skuld af te skryf wat deur plaaslike owerhede verskuldig is, maak nie sakesin nie en kan hulle nie in staat stel om dienste te lewer nie.NamWater se uitvoerende hoof Abraham Nehemiah het gesê die afskryf van skuld sal die besigheid sonder geld laat om sy bedrywighede uit te voer. Hy het voorgestel die regering aanvaar eerder verantwoordelikheid vir die skuld.
Plaaslike owerhede skuld NamWater sowat N$1 miljard.
“Dit maak nie besigheidsin om skuld af te skryf nie. Ons het ’n voorlegging gemaak dat die regering die skuld omhein en dit oor vier of vyf jaar betaal,” het hy gesê.
“NamWater moet koste verhaal om dienste te lewer. Waar sal die maatskappy geld kry om dienste te lewer as skuld afgeskryf word? Dit maak nie besigheidsin nie.”
NamPower se besturende direkteur Kahenge Haulofu het soortgelyke kommer uitgespreek. “Om skuld af te skryf vir plaaslike owerhede wat agterstallig is, sal ’n presedent skep vir ander om nie hul verantwoordelikheid na te kom om vir hul skuld te betaal nie, aangesien hulle sal verwag dat NamPower hulle skuld ook sal afskryf.”
Hy sê voorts die voorgestelde skuldafskrywings sal die besigheid met beperkte kapasiteit laat om nuwe projekte uit te voer. “Dit sal ons kontantvloei beïnvloed en gevolglik die implementering van beplande projekte. Uiteindelik sal dit NamPower se volhoubaarheid beïnvloed wat groot elektrisiteitstoevoeronderbrekings in die land kan veroorsaak.”
Landless People's Movement (LPM) parlementslid Henny Seibeb het onlangs ’n mosie ingedien dat NamWater en NamPower geld wat plaaslike owerhede aan hulle verskuldig is, afskryf.
Hy het gesê die onvermoë van munisipaliteite om skuldbetalings na te kom, is ’n doring in die vlees van plaaslike owerhede en het die kommodifikasie van natuurlike hulpbronne, soos water, voortgesit in ’n nuwe vorm van verarming van die gemeenskappe.
“Die mosie poog om strategieë aan te spreek om alle waterskuld van die gemeenskappe af te skryf, veral vir senior burgers, behoeftige/armoede-geteisterde [en] werklose inwoners,” het hy gesê.
NamWater het vroeër vanjaar die regering versoek om te help om die rekeninge te vereffen van entiteite wat gratis water voorsien is ná die uitrol van die Covid-19-noodtoestand in 2020.