Ford se Everest Wildtrak laat bloed vinniger klop
Ons het onlangs die nuutste weergawe (2024) van Ford se groot familiesevensitter-SUV, die Everest in Wildtrak 3.0 V6 4x4-afwerking, vir ’n week getoets.Terwyl die Everest oënskynlik met ander gewilde familie-SUV’s vergelyk word, kompeteer dit nie werklik op gelyke voet met die Toyota Fortuner, Isuzu MU-X of Mitsubishi Pajero Sport nie. Dit is nie net groter nie, maar dit is ook een van net twee familie-SUV’s met ’n V6-turbodieselenjin (die ander is die Everest Platinum-model).
Die Everest Wildtrak is indrukwekkend groot en bied ’n grondvryhoogte van 226 mm, danksy onder meer 255/55/R20 AT-bande op pragtige 20-duim swart en silwer allooivellings. Die hoekige ontwerp pas die reguit voor- en agterkant, terwyl die sierrooster aan die Wildtrak ’n imponerende teenwoordigheid op die pad gee. Die groot elektriese agterklap bied praktiese toegang tot die bagasieruim, wat verder vergroot wanneer die derde ry sitplekke platgevou word.
Die nuwe generasie LED-hoofligte en -agterligte dra by tot die Everest se moderne, futuristiese voorkoms.
Binne
Binne is die kajuit hoofsaaklik in swart leer beklee, maar die elektriese tweepaneel-panoramiese glasdak bring genoeg lig in die ruimte. Die dak se binnevoering is ook swart. Tipies Wildtrak is die stiksels en “Wildtrak”-kentekens op die voorste kopstukke in oranjegeel.
Die kajuit lyk en voel luuks én modern, veral met die groot portretstyl-raakskerm bo in die middel van die voorpaneel. Die digitale instrumentepaneel vertoon hoofsaaklik in Ford se tradisionele blou skynsel.
Die elektries verstelbare, verhitte en verkoelde voorsitplekke is hoog geplaas en bied ’n uitstekende panoramiese uitsig oor die enjinkap. Die kantspieëls is groter as normaal en huisves die kameras vir die 360°-kamerastelsel.
Die 2025 Everest Wildtrak is omvattend toegerus met geriefsitems, gevorderde bestuurderhulpstelsels en aktiewe en passiewe veiligheidskenmerke. Daar is onder meer ’n koordlose laaibak vir slimfone; USB-A- en USB-C-punte vir agterste passasiers; 400 W-inverter met AC-kragpunt; afsonderlike klimaatbeheer vir die agterste sitplekke; en 12-duim SYNC4A-infotainmentstelsel met Apple CarPlay en Android Auto.
Die gerieflike kajuit bied gemaklik sitplek aan vyf volwassenes, met ’n verdere twee sitplekke in die derde ry — meer geskik vir jong tieners.
Aandrywing
Die Everest Wildtrak is toegerus met Ford se nuwe generasie kragtige 3.0-liter V6-turbodiesel wat 184 kW en 600 Nm moeiteloos lewer. Krag word permanent na al vier wiele gestuur via ’n tweespoed-oordragkas en Ford se uitstekende 10-spoed outomatiese ratkas, geïntegreer met die Terrain Response-viertrekstelsel met verskeie ry-modi en laestrek.
Die ratkas en enjin is uitstekend gepaar vir gladde oorskakeling, met die 600 Nm wringkrag wat ratwisselings byna ongemerk laat gebeur.
Oor ’n rit van sowat 1 000 km het die kragtige V6 verbasend ekonomies gevaar vir ’n enjin van hierdie grootte. Tydens die toets het ons meer as 3 ton gesleep op teer, grondpaaie en dik sand. Ten spyte hiervan was ons gemiddelde brandstofverbruik ’n indrukwekkende 10,1 L/100 km. Hou in gedagte dat ons gereeld in hoë- en laestrek moes sleep.
Op die pad
Die Everest Wildtrak ry en hanteer uiters gemaklik, selfs op grondpaaie en met ’n swaar gelaaide sleepwa agteraan. Gelukkig kom die Wildtrak standaard met ’n sleepstang.
Danksy die opgegradeerde T6-platform, wat dit met die Ranger deel, en die vervanging van tradisionele bladvere met vere en skokbrekers, is ritgehalte en hantering baie beter as dié van mededingers met leerraam-onderstelle. Op teer bied die Everest klasleidende rygerief, met uitstekende klankisolasie en opvallend lae pad- en windgeraas.
Die kombinasie van ’n uitstekende viertrekstelsel en ’n elektroniese agter-ewenaarslot maak die Wildtrak gemaklik en uiters bekwaam in die veld.
Na ’n week en heelwat kilometers was dit moeilik om afskeid te neem van die 2025 Ford Everest Wildtrak 3.0 TD V6 4x4. Dit is ’n baie bekwame en volledig toegeruste sewesitplek-SUV met luukse afwerking en uitstaande rygerief. Die veldryvermoë en ritgehalte is bó gemiddeld, en die brandstofverbruik het beslis beïndruk.
Die ware juweel is die kragtige V6-turbodiesel - ’n enjin met ’n klank wat enige petrokop se bloed vinniger laat vloei.