Dis ’n 100 vir Ada!
Vir die Windhoeker Ada Kahl (18) was 30 Maart ’n dag om te vier toe sy haar 100ste parkrun voltooi het.Parkrun is ’n weeklikse gemeenskapsgeleentheid waar deelnemers 5 km gratis stap of draf vir ’n goedvoel-voorloper tot die naweek.
Die deelnemers se tyd word gemeet deur hul registrasiekodes te skandeer. Op dié manier ding almal teen hulself mee en is jy jou eie grootste kompetisie.
Ada vertel hoe haar reis begin het.
“My ma is ’n entoesiastiese drawwer en het jare gelede parkrun ontdek. Sy het die res van die gesin so een vir een gemotiveer en vandag neem ons almal deel soos die dagboek dit toelaat.”
Sy brei verder uit: “Ek het in Januarie 2015 aan my eerste parkrun deelgeneem. Ek was nege jaar oud en dit was by Naval Hill in Bloemfontein in die Vrystaat, Suid-Afrika. Vir die res van die jaar was dit my tuis-parkrun, aangesien ons toe daar gewoon het.
“Nege jaar later kon ek my 100ste parkrun in Springbok in die Noord-Kaap voltooi. Dit was ’n heerlike ervaring in ’n onverwagse pragtige omgewing.”
Sy sê hoewel sy gewoonlik alleen draf is hulle drie deelnemers in Windhoek wat mekaar weekliks uitdaag en ongeveer dieselfde tye aanteken.
“Dis die lekkerte van parkrun, jy hoef nooit alleen deel te neem nie, want daar is byna altyd iemand wat min of meer dieselfde pas as jy hardloop en wat bietjie uitdaging en gesonde mededinging by die geleentheid voeg.
“Ek sal absoluut aanbeveel dat mense aan parkrun deelneem. Dis ’n heerlike manier om te oefening en jou naweek op ’n hoë noot af te skop. Die geselskap is heerlik, en in Windhoek is die omgewing van die groen golfbaan en vroegoggend-voëllewe pragtig. Natuurlik is ’n koffie ná die tyd nie te versmaai nie en deel van die sosiale sy wat parkrun bied.
“Die parkrun-gemeenskap ondersteun mekaar en die aanmoediging wanneer jy by ’n kontrolepunt verbybeweeg motiveer jou.
Sy sê dit is vir haar ’n groot voorreg om weekliks saam met haar gesin deel van die geleentheid te kan wees, aangesien dit soos ’n viering van ’n gesonde leefstyl en liggaam voel.
Ada se pa, Marthinus, het op 13 April 2024 sy 100ste parkrun in Melkbosstrand in die Kaap voltooi. Dit is voorwaar ’n besonderse tradisie wat die Kahl-gesin met mekaar deel.
Vir Ada is die verskillende plekke waar sy al deelgeneem het ’n hoogtepunt vir haar.
“Ek het al by 23 verskillende bestemmings deelgeneem en dié langs die see is altyd besonders.
“Ek is beslis nog lank nie klaar met parkrun nie en werk aan die volgende 100!”
Ada is tans ook een van die beste fietsryers in haar ouderdomsgroep in Namibië.
Die Windhoek-parkrun begin byna elke Saterdag stiptelik om 08:00 by die Windhoek Golf en Country Club. Die eerste geleentheid het in Teddington in die Verenigde Koninkryk op 2 Oktober 2004 plaasgevind en vier dus vanjaar sy 20ste bestaansjaar.
Dit het intussen na 22 lande, onder meer Australië, Nieu-Seeland, Suid-Afrika en Namibië, uitgebrei.
Enigiemand kan deelneem, registrasie is gratis en daarna is daar geen verskoning meer nie – die wêreld is oop voor jou en jou tekkies.
– [email protected]