Speenkalwers stroom na Suid-Afrika
Meer as 79 000 skape uitgevoer
Die Lewendehawe- en Lewendehaweprodukteraad sê in sy Maart-verslag dat vleisbemarking aansienlik toegeneem het weens die droogte.
Die droogtetoestande in die land het veebemarking aansienlik in die eerste kwartaal laat styg. Die uitvoer van beeste op die hoef is op ’n jaargrondslag 71,3% hoër as in Maart verlede jaar, met hoofsaaklik speenkalwers wat na Suid-Afrika, Angola, Botswana en Zimbabwe uitgevoer is.
Altesaam 57 415 beeste is sedert die begin van die jaar uitgevoer, met die meeste uitvoere wat in Februarie aangeteken is.
Dit is volgens die Lewendehawe- en Lewendehaweprodukteraad se Maart-verslag.
In Maartmaand het die uitvoer van beeste op die hoef met 1,24% gedaal vanaf die 21 608 beeste wat in Februarie uitgevoer is.
Beesbemarking gedurende die eerste kwartaal het aansienlik toegeneem weens die droogte. Tot 99% van uitgevoerde beeste, hoofsaaklik speenkalwers, was vir Suid-Afrika bestem, en die oorblywende 1% is tussen Angola en Botswana verdeel.
Die meeste beeste wat na Suid-Afrika uitgevoer is, het na voerkrale gegaan, terwyl uitvoere na die res van die Suider-Afrikaanse Ontwikkelingsgemeenskap (SADC) vir boerdery (teeldoeleindes) uitgevoer is.
Speenkalfpryse het met N$3,42/kg gedaal – vanaf die Februarie-prys van N$25,55/kg tot N$22,13/kg in Maart. Speenkalfveilings suid van die veaartsenykordonheining het ’n afname van onderskeidelik 13,39% en 12,96% in veilingspryse van tollies en verse aangeteken.
Die daling in pryse was as gevolg van ’n styging van 2,16% in geelmieliepryse gedurende Maart.
“Die afname in die speenkalf en B2-karkasprysverhouding dui aan dat dit meer winsgewend is om speenkalwers tot slaggewig te laat groei, maar weens die droogtetoestande sal die uitvloei van speenkalwers na Suid-Afrika waarskynlik voortduur, ongeag stabiele en relatief hoë plaaslike produsentepryse,” lui die verslag.
Speenkalfpryse sal na verwagting in April 2024 met 6,16% tot N$23,49/kg styg, en B2-karkaspryse tot N$60,06/kg.
Uitvoerabattoirs het ’n groei in verslagting van 93,65% op ’n maand-tot-maand-basis gehad, en 28,17% op ’n jaargrondslag.
“Verslagting by plaaslike abattoirs het ’n trae groei van 52,36% op ’n jaar-tot-jaar-basis aangeteken,” lui die verslag.
SKAPE
Lewende skaapuitvoere het op ’n maand-tot-maand-grondslag met 64% toegeneem, van die 48 242 skape wat in Februarie uitgevoer is tot 79 033 wat in Maart uitgevoer is, maar het aansienlik afgeneem op ’n jaar-tot-jaar-basis.
Verder het verslagting by uitvoer- en plaaslike abattoirs met onderskeidelik 17% en 13% toegeneem.
Gedurende Maart het produsente mededingende pryse by abattoirs behaal, volgens die Lewendehawe-raad.
Die meerderheid van die uitvoere in Maart (98%) het na Suid-Afrikaanse abattoirs gegaan, terwyl die res, slegs 2% na Angola uitgevoer is. Verslagting by uitvoerabattoirs het op ’n jaar-tot-jaar-grondslag met 41% gedaal.
Suid-Afrikaanse pryse het ’n relatief stabiele dalende neiging van 3,21% in Maart getoon.
BOKKE
Altesaam 9 175 bokke is op die hoef in Maart uitgevoer, ’n toename van 21,23% op ’n maand-tot-maand-grondsalg. Dit toon ’n merkbare toename in lewende uitvoere sedert die begin van die jaar. Suid-Afrika maak 98% van die totale uitvoer van lewende bokke uit Namibië uit, gevolg deur Zimbabwe en Zambië teen 1% elk.
Die algehele uitvoer van lewende bokke het op ’n jaar-tot-jaar-grondslag tot 7,35% toegeneem.
Boklam- en ooiveilingspryse het op ’n jaar-tot-jaar-grondslag onderskeidelik tot 11,54% en 3,47% gedaal. Die pryse van kapaters en ramme het egter op ’n maand-tot-maand-grondslag onderskeidelik met 4,22% en 20,81% gestyg.
VARKE
Slegs 4 100 varke is gedurende Maart by die Mariental- en Halooli-abattoirs geslag, wat met 7% op ’n maand-tot-maand-basis gegroei het vanaf die 3 846 varke wat in Februarie geslag is.
Die slagkoerse van varke het ’n opwaartse neiging getoon, met die hoogste slagkoers van 4 307 varke wat in Januarie aangeteken is.
Namibië se plafonprys vir varkvleis bly vasgestel op N$51,03/kg. Suid-Afrikaanse varkvleispryse het insgelyks van die N$31,40/kg in Februarie tot N$31,81/kg in Maart gestyg. Dit toon ’n groei van 1,31% op ’n maand-tot-maand-grondslag.
Varkafval is die grootste ingevoerde produk in Januarie 2024, met meer as 300 ton wat ingevoer word. Die invoer van varkkarkasse het op ’n maand-tot-maand-grondslag met 68% gedaal, terwyl gaar varkvleis en ongekookte verwerkte varkvleis met 32% gedaal het.
Varkafval het 54% van die totale invoer van varkvleis vir Maart uitgemaak, gevolg deur gaar varkvleis en ongekookte verwerkte varkvleis wat 30% van die totale invoer uitgemaak het, en varkkarkasse 12%.
– [email protected]