Kragbote brul by Von Bach
Die Namibiese Opblaaskragbootvereniging (Namibia Inflatable Powerboat Association, NIPA) het onlangs ’n uiters suksesvolle ontwikkelingsdag en kompetisie by die Von Bachdam, noord van die hoofstad, aangebied.
NIPA streef daarna om nuwe deelnemers, jong entoesiaste en gesinne in ’n veilige omgewing aan dié opwindende sport bekend te stel.
Die geleentheid vorm deel van NIPA se voortgesette poging om kragbootrenne in Namibië te bevorder deur breër en meer inklusiewe deelname uit alle gemeenskappe in die land aan te moedig. Nuwelinge kry die geleentheid om die sport in ’n veilige, gestruktureerde en genotvolle omgewing te ervaar.
Die sosiale en ontwikkelingsbyeenkoms het goeie ondersteuning geniet, met talle toeskouers en potensiële jaers wat vir die eerste keer aan die dag se aktiwiteite deelgeneem het. Ongeveer 12 bote het vir die kompetisie ingeskryf. Die twee bote wat vir ontwikkelingsdoeleindes beskikbaar gestel is, is gebruik om nuwelinge aan kragbootrenne bekend te stel en hulle die geleentheid te bied om praktiese ondervinding in beheerde omstandighede op te doen.
Drie renne van agt rondtes elk is aangebied, gevolg deur die opwindende, maar uiters veeleisende, 60 km-resies.
Die deelnemers het weer eens hoogs mededingende aksie en vinnige renne gelewer. De Wet Oosthuizen, wat in die Lighthouse-boot gejaag het, het die eerste en tweede ren gewen, terwyl Leon Smith die derde en finale ren ingepalm het. Johan Lucas het egter die 60 km-resies oorheers en eerste geëindig.
Een van die hoogtepunte van die dag was die oomblikke toe bote byna kop-aan-kop, en soms slegs enkele bootlengtes van mekaar, oor die water voortgesnel het. Dit was weer ’n bewys van die hoë standaard van kragbootrenne in die land en die vinnige ontwikkeling van die sport in Namibië.
Union Internationale Motonautique
NIPA is tans besig met die proses om by die UIM (Union Internationale Motonautique), die internasionale beheerliggaam vir kragbootrenne, te registreer. Die vereniging se langtermyndoelwit is om ’n UIM-wêreldkampioenskap in Namibië aan te bied.
Die beamptes wat by die kompetisie betrokke was, Quinton Liebenberg en Keren Robintill, het die professionele wyse waarop die byeenkoms aangebied is, geloof. Die veteraan, Derek van der Merwe, het die naweek as ’n groot sukses bestempel.
Leon Smith, voorsitter van NIPA, het gesê: “Belangstelling in die sport bly groei. Daar is reeds twee deelnemende skole wat aan NIPA se jeugontwikkelingsprogram deelneem, en ons verwag dat nog bykomende skole by ons sal aansluit.”
